A ranar Juma’a, gwamnan Muhammadu Abubakar ya bayyana dalilin da yasa mutane ke kiran sa da Baba Mai Kalkuleta, yana mai cewa jajircewarsa na sanya abubuwan da suka fi dacewa daidai da samun kudi ya sa ya sami kwanciyar hankali.
Gwamna Badaru ya yi wannan magana ne yayin da ya karbi bakuncin tsohon kwanturola janar na hukumar shige da fice ta Najeriya, Mohammed Babandede a ranar Juma’ar da ta gabata.
Babandede, dan asalin karamar hukumar Hadejia a jihar Jigawa, kwanan nan ya yi ritaya daga aiki bayan ya rike mukamin kwanturola-janar na tsawon shekaru biyar.
Gwamnan, wanda ya ce ya shafe shekaru da yawa yana kasuwanci kafin ya shiga siyasa, ya ce alhakin shugaba ne a ya yi la’akari da wadanda za su tabu da hukuncin da ya yanke.
Ya ce idan a matsayinsa na dan kasuwa ba zai iya yin barna da dukiyarsa ba, bai ga dalilan da zai sa ya canza a matsayin ma’aikacin gwamnati ba.
Amma, ya ce mutane da yawa sun ki fahimtar ma’anar lakabin nasa, suna ci gaba da tafka kuskuren fassara shi suna cewa rowa ce.
“Mutane sun ki fahimtar ma’anar kalkuleta; daraja kudi ce kawai, wato, samar da abubuwan da suka fi dacewa a kan daidaitaccen farashi.
“Ya rage ga shugaba ya yi hukunci tsakanin gina wa kansa gida na alfarma da kuma samar da ayyuka na yau da kullun don amfanin al’umma. Dole ne ku auna tsakanin abubuwan aiwatarwa, wanne ne mutane za su anfana? Wannan ita ce ma’anar abin da muke yi, ni da Babandede.
“Kasancewar anfani da kalkuleta ba batun rowa bane, yana nufin sanya abubuwan da suka fi dacewa da kyau da kuma yin su da kyau. Kuma abin farinciki, shine na kasance a bangaren kasuwanci na dogon lokaci.
“Don haka na san farashin kusan komai kuma ina da lambobin tuntubar wadanda suka san farashi. Don haka muna kokarin daidaita kashe kudi daidai wa daida.”
Gwamnan ya ce babu wanda zai iya ba shi farashin N40,000 a abin da za a iya yi a kan N20,000. “to wannan shine kalkuleta.”
“Da zarar kun kasance a rayuwar jama’a da siyasa, dole ne tunaninku ya canza. Babban damuwar ku shine mutanen da suka zabe ku,” in ji Gwamna Badaru.
